ເພີ່ມທັກສະຄວາມຮູ້ການສຳພາດ ແລະ ການສົນທະນາຂ່າວ

ສະ​ຖາ​ບັນ​ສື່​ມວນ​ຊົນ ວັດ­ທະ­ນະ­ທຳ ແລະ ທ່ອງ​ທ່ຽວ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ຮ່ວມ​ກັບ​ກົມ​ສື່​ມວນ​ຊົນ ກະ­ຊວງ​ຖະ­ແຫຼງ​ຂ່າວ ແລະ ການ​ສື່­ສານ ສສ ຫວຽດ­ນາມ ຈັດ​ເຝິກ­ອົບ­ຮົມ​ໃຫ້​ສື່​ມວນ​ຊົນ​ລາວ​ທົ່ວ​ປະ­ເທດ ພາຍ​ໃຕ້​ຫົວ­ຂໍ້: “ທັກ​ສະ­ການ​ສຳ­ພາດ ແລະ ການ​ສົນ­ທະ­ນາ​ຂ່າວ​ສະ­ຖາ­ນະ​ການ” ຂຶ້ນ​ວັນ​ທີ 9-13 ກັນ­ຍາ 2019 ທີ່​ສະ​ຖາ​ບັນ​ສື່​ມວນ​ຊົນ ເປັນ​ປະ­ທານ​ຮ່ວມ​ຂອງ​ທ່ານ ວິ­ໄລ​ທອງ ສີ​ຊາ​ນົນ ຫົວ­ໜ້າ​ສະ​ຖາ​ບັນ​ສື່​ມວນ​ຊົນ ວັດ­ທະ­ນະ­ທຳ ແລະ ທ່ອງ​ທ່ຽວ ທ່ານ ຫງວ​ຽນ ຄັກ ຮ່ຽວ ຮອງ​ຫົວ­ໜ້າ​ກົມ​ສື່​ມວນ​ຊົນ ມີ​ຄູ​ເຝິກ ສຳ​ມະ​ນາ​ກອນ ແລະ ແຂກ​ຖືກ​ເຊີນ​ເຂົ້າ​ຮ່ວມ.

ຊຸດ​ອົບ­ຮົມ​ຄັ້ງ​ນີ້ ເປັນ​ການ​ຍົກ​ລະ­ດັບ​ຄວາມ​ຮູ້​ຄວາມ​ສາ­ມາດ​ໃນ​ການ​ສຳ­ພາດ ຫຼື ການ​ສົນ­ທະ­ນາ​ໃນ​ລາຍ­ການ​ຂ່າວ ເພື່ອ​ເຈາະ​ເລິກ​ບັນ­ຫາ ເຈາະ​ຈິ້ມ​ເອົາ​ຂໍ້​ມູນ ຂຽນ​ຂ່າວ ເພື່ອ​ດຶງ​ດູດ​ຜູ້​ອ່ານ ຜູ້​ຟັງ ຜູ້​ຊົມ ໃນ​ຫົວ­ຂໍ້​ຕ່າງໆ ເຊັ່ນ: ການ­ເມືອງ ເສດ­ຖະ­ກິດ ວັດ­ທະ­ນະ­ທຳ-ສັງ­ຄົມ ກໍ​ຄື ບັນ­ຫາ​ຕ່າງໆ​ທີ່​ສັງ­ຄົມ​ຕິດ­ຕາມ ສົນ­ໃຈ ຢາກ​ຮູ້ ເພື່ອ​ແກ້​ໄຂ​ຂໍ້​ຂ້ອງ​ໃຈ ເພື່ອ​ຄວາມ​ກະ­ຈ່າງ​ແຈ້ງ ໃຫ້​ສັງ­ຄົມ​ໄດ້​ລຸ​ໂລ່ງ​ເຂົ້າ­ໃຈ ແລະ ເຫັນ​ດີ ເຫັນ​ພ້ອມ​ຕໍ່​ແນວ­ທາງ​ນະ­ໂຍ­ບາຍ​ຂອງ​ພັກ-ລັດ­ຖະ­ບານ​ຂອງ​ເຮົາ.

ປັດ­ຈຸ­ບັນ ການ​ລາຍ​ງານ​ຂ່າວ ມັນ​ຮຽກ­ຮ້ອງ​ໃຫ້​ຕ້ອງ​ວ່ອງ­ໄວ ທັນ​ການ ທັນ​ສະ­ໄໝ ຄົບ​ຖ້ວນ ຊັດ​ເຈນ ຈະ­ແຈ້ງ ມີ​ເຫດ​ມີ​ຜົນ ເຈາະ​ເລິກ​ໄດ້​ບັນ­ຫາ​ທີ່​ສົນ­ໃຈ​ຂອງ​ສັງ­ຄົມ ດັ່ງ­ນັ້ນ ນັກ​ຂ່າວ​ຕ້ອງ​ໄດ້​ຊອກ​ຮູ້ ແລະ ພັດ­ທະ­ນາ​ຕົນ​ເອງ​ໃຫ້​ທັນ​ກັບ​ຄວາມ​ຮຽກ­ຮ້ອງ​ຕ້ອງ­ການ ທັນ​ກັບ​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ ມັນ​ແມ່ນ​ຄວາມ​ຈຳ­ເປັນ​ທີ່​ຈະ​ຕ້ອງ​ເຮັດ​ໃນ​ຍຸກ​ດີ​ຈິ​ຕອນ ແລະ ຊຸດ​ອົບ­ຮົມ​ຄັ້ງ​ນີ້​ຈະ​ເພີ່ມ​ທັກ​ສະ​ຄວາມ​ຮັບ​ຮູ້ ຄວາມ​ສາ­ມາດ​ໃຫ້​ສູງ​ຂຶ້ນ​ຕື່ມ​ອີ​ກ້າວ​ໜຶ່ງ​ລະ­ອຽດ ແລະ ເລິກ­ເຊິ່ງ​ກວ່າ​ເກົ່າ ແນ­ໃສ່​ຕອບ​ສະ­ໜອງ​ຕາມ​ຄວາມ​ຮຽກ­ຮ້ອງ​ຕ້ອງ­ການ​ຂອງ​ໜ້າ­ທີ່​ວຽກ​ງານ​ທີ່​ພັກ ແລະ ລັດ ມອບ​ໝາຍ​ໃຫ້.

 

ແຫຼ່ງຂ່າວ: ວຽງຈັນໃໝ່

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *