ລາວ-ໄທຈັດກິດຈະກໍາແລ່ນມິນິມາລາທອນ

ເມືອງຫ້ວຍຊາຍ ແຂວງບໍ່ແກ້ວ ສ ປປ ລາວ ແລະ ອໍາເພີຊຽງຂອງ ຈັງຫວັດຊຽງຮາຍ ລາຊາອານາຈັກໄທ ໄດ້ພ້ອມກັນຈັດກິດຈະກໍາແລ່ນມິນິມາລາທອນ ສົ່ງເສີມການທ່ອງທ່ຽວໄດ້ຈັດຂຶ້ນໃນວັນທີ 8 ກັນຍານີ້ ຈຸດສະຕາດແມ່ນ ເລີ່ມແຕ່ໜ້າດ່ານສາກົນອໍາເພີຊຽງຂອງຜ່ານຂົວມິດຕະພາບ 4 ລາວ-ໄທ ເຂົ້າມາເມືອງຫ້ວຍຊາຍ ແຂວງບໍ່ແກ້ວ ເຂົ້າຮ່ວມມີທ່ານ ຈອມສີ ລັດຕະນະປັນ ຮອງເຈົ້າແຂວງ ແຂວງບໍ່ແກ້ວ ແລະ ທ່ານ ພາດສະເດດ ຫົງລະດາວັນ ຮອງຜູ້ວ່າຣາຊະການຈັງຫວັດຊຽງຮາຍ ພ້ອມດ້ວຍນັກກິລາທັງ 2 ເມືອງ ເຂົ້າຮ່ວມທັງໝົດ 2,900 ຄົນ. ທ່ານ ພາດສະເດດ ຫົງລະດາວັນ ໄດ້ໃຫ້ຈຸດປະສົງຂອງການຈັດກິດຈະກຳຄັ້ງນີ້ວ່າ: ເພື່ອສືບຕໍ່ຈັດການແຂ່ງຂັນກິລາມວນຊົນ, ແລ່ນມິນິມາລາທອນ, ແລ່ນໄວ ແລະ ກິລາຂີ່ລົດຖີບ ຢູ່ອຳເພີຊຽງຂອງ ໃຫ້ໄດ້ເຄື່ອນໄຫວຢ່າງຕໍ່ເນື່ອງ, ເປັນການເຊື່ອມໂຍງສາຍສໍາພັນຄວາມສາມັກຄີ ປະຊາຊົນສອງເມືອງຫ້ວຍຊາຍ ແຂວງບໍ່ແກ້ວ ກັບ ອຳເພີ ຊຽງຂອງ ຈັງຫວັດ ຊຽງຮາຍ ໃຫ້ນັບມື້ແໜ້ນແຟ້ນ ທັງເປັນກາລະໂອກາດໄດ້ພົບປະແລກປ່ຽນບົດຮຽນເຊິ່ງກັນ ແລະ ກັນ. ກ່ຽວກັບວຽກງານກິລາກາຍຍະກຳ, ວິຖີຊີວິດວັດທະນະທຳ ແລະ ດ້ານການທ່ອງທ່ຽວ ໃຫ້ເດີນແມ່ນແລ່ນສະດວກຂຶ້ນເລື້ອຍໆ. ອີກດ້ານໜຶ່ງແມ່ນສົ່ງເສີມໃຫ້ປະຊາຊົນໄດ້ອອກກໍາລັງກາຍເພື່ອສຸຂະພາບດີ, ສົ່ງເສີມດ້ານການທ່ອງທ່ຽວ, ສ້າງສິ່ງເອື້ອອຳນວຍຄວາມສະດວກໃຫ້ແກ່ການພັດທະນາເສດ ຖະກິດຂອງຊຸມຊົນ, ປະຊາຊົນຢູ່ແຕ່ລະທ້ອງຖິ່ນໃຫ້ມີການຂະ ຫຍາຍຕົວດີຂຶ້ນເປັນກ້າວໆ. ການແຂ່ງຂັນກິລາແລ່ນມິນິມາລາທອນຄັ້ງນີ້ ມີນັກກິລາຈາກທຸກພາກສ່ວນທັງພາກລັດ, ເອກະ ຊົນ, ປະຊາຊົນທຸກເພດ, ທຸກໄວ, ຜູ້ໃຫຍ່, ເດັກນ້ອຍ ເຂົ້າຮ່ວມທັງໝົດ 2,900 ກວ່າຄົນ, ໃນນີ້ ມີທີມນັກກິລາຂອງເມືອງຫ້ວຍຊາຍ ແຂວງບໍ່ແກ້ວ ເຂົ້າຮ່ວມຈຳນວນ 100 ກວ່າຄົນ. ເຊິ່ງການແລ່ນໄດ້ແບ່ງເປັນ 3 ໄລຍະທາງຄື: ໄລຍະ 5 ກິໂລແມັດ, 10 ກິໂລ ແມັດ ແລະ ໄລຍະ 21 ກິໂລແມັດ ແຕ່ລະໄລຍະນັກແລ່ນຕ້ອງໄດ້ເລີມແລ່ນຈາກຈຸດເລີມຕົ້ນຢູ່ໜ້າດ່ານສາກົນອໍາເພີຊຽງຂອງ, ຜ່ານຂົວມິດຕະພາບລາວ-ໄທແຫ່ງທີ່ 4, ດ່ານສາກົນເມືອງຫ້ວຍຊາຍ, ໂຮງແຮມນົກຍຸງຄຳ ບ້ານວຽງໃໝ່, ບ້ານປາກຮາວໃຕ້, ຫໍຫຼັກເມືອງ, ເຂົ້າທາງອາສາມສູ່ບ້ານ ມົກະຈອກ, ປາກຮາວເໜືອ ແລະ ລ້ຽວກັບຄືນຢູ່ບໍລິເວນໜ້າໂຮງແຮມໝອນທອງ ບ້ານອຸດົມ ກັບຄືນສູ່ຂົວມິດຕະພາບ ລາວ-ໄທ ແຫ່ງທີ່4.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *