ຂ່າວດີໆ!! ຮຽນບໍ່ຈົບມໍຕົ້ນ ກໍ່ສະໝັກທຶນຮຽນຟຣີໄດ້ ທີ່ວຽງຈັນພັດທະນາອາຊີບ

ການມີວິຊາຊີບຕິດໂຕ ເປັນສິ່ງສຳຄັນທີ່ຈະຊ່ວຍໃຫ້ຄົນເຮົາປະກອບອາຊີບລ້ຽງຊີວິດຕົນເອງໄປຈົນຮອດມື້ສຸດທ້າຍຂອງຊີວິດ. ສະນັ້ນ, ການສຶກສາ, ການຮຽນຮູ້ ແລະ ຊອກຫາປະສົບການໃໝ່ໃຫ້ຕົນເອງ ຈຶ່ງເປັນເລື່ອງທີ່ສຳຄັນຫຼາຍໃນປັດຈຸບັນ.

ສະເພາະນ້ອງໆຜູ້ທີ່ດ້ອຍໂອກາດໄດ້ສຶກສາຮໍ່າຮຽນ ບໍ່ວ່າຈະເປັນດ້ວຍສະພາບຄອບຄົວບໍ່ເອື້ອຍອຳນວຍ ຫຼື ເຫດຜົນໃດກໍ່ຕາມ, ຫາກມີໃຈຮັກ ແລະ ຢາກມີວຽກເຮັດງານທຳສາມາດມາສະໝັກຂໍທຶນຮຽນຟຣີ ໄດ້ທີ່ວິທະຍາໄລວຽງຈັນພັດທະນາອາຊີບ. ວິທະຍາໄລວຽງຈັນພັດທະນາອາຊີບ ໄດ້ເປີດໂອກາດໃຫ້ນ້ອງໆທີ່ຮຽນຈົບປະຖົມ ແຕ່ບໍ່ຈົບມັດທະຍົມຕົ້ນ ແລະ ມັດທະຍົມປາຍ ມາສະໝັກຂໍທຶນຮຽນຟຣີ ວິຊາການໂຮງແຮມ ແລະ ປຸງແຕ່ງອາຫານໄດ້ ນັບແຕ່ມື້ນີ້ຮອດວັນທີ 23 ກັນຍາ 2019 ນີ້ເທົ່ານັ້ນ (ເຊິ່ງການມາສະໝັກຕ້ອງຖືໃບປະກາດປະຖົມໂຕແທ້ ແລະ ສຳມະໂນຄົວມາຍື່ນເອົາຄຳຮ້ອງຂໍທຶນ) ເນື່ອງຈາກຈຳນວນທຶນມີຈຳກັດ.

ເຊິ່ງລາຍລະອຽດຂອງການມາສະໝັກຂໍທຶນຮຽນແມ່ນວັນທີ 22 ກັນຍາ 2019 ຕ້ອງມາຍື່ນເອກະສານໃຫ້ຄົບໝົດ ແລະ ວັນທີ 24 ກັນຍາ 2019 ສໍາພາດເຂົ້າຮຽນ ຖ້າໃຜບໍ່ມາຍື່ນເອກະສານ ຕາມນັດ ແລະ ບໍ່ມາສຳພາດຈະຖືກວ່າສະຫຼະສິດ.

ສ່ວນມື້ເຂົ້າຮຽນແມ່ນວັນທີ 01 ຕຸລາ 2019 ໄລຍະຮຽນ 03 ເດືອນ ຊັ້ນຕົ້ນ, ຫຼັງຈາກຈົບທາງວິທະຍາໄລວຽງຈັນພັດທະນາອາຊີບຊອກວຽກໃຫ້ພ້ອມ ( ຮຽນໝົດມື້ຈັນຫາສຸກ) ຢູ່ຫໍພັກນຳໂຮງຮຽນ ສຳລັບເງື່ອນໄຂຜູ້ສະໝັກແມ່ນ: ອາຍຸໃນລະຫວ່າງ 18-30 ປີ (ບູລິມະສິດເນັ້ນເພດຍິງ ແລະ ຊົນເຜົ່າ) ສາມາດອ່ານຂຽນພາສາລາວໄດ້ເປັນ; ບຸກຄົນທີ່ບໍ່ເຄີຍຮຽນວິຊາຊີບໃດໆມາກ່ອນ; ຄອບຄົວບໍ່ມີທຶນພຽງພໍສົ່ງລູກຫຼານຮຽນ, ແລ້ວຕ້ອງໄດ້ໄປເຮັດວຽກໃນວິຊາຊີບທີ່ຕົນຮຽນຈົບ ເພາະຫຼັງຈາກຈົບ ວິທະຍາໄລຈະຊ່ວຍຊອກວຽກໃຫ້ ຫຼື ນັກຮຽນຊອກຮ່ວມກັນ ແລະ ມີພາຫະນະທຽວການ. ສ່ວນສິ່ງທີ່ຜູ້ຮຽນຈະໄດ້ຮັບໃນໄລຍະຮຽນມີດັ່ງນີ້: ຄ່າເດີນທາງສະເພາະມາຮຽນຄັ້ງທຳອິດ ແລະ ຫຼັງຈາກຮຽນຈົບ; ມີຫໍພັກໃຫ້ຢູ່ຟຣີ + ເຄື່ອງບ່ອນຢູ່ບ່ອນນອນ 1 ຊຸດ; ໄດ້ຮັບເຄື່ອງແບບຮຽນ 2 ຊຸດ; ມີເງິນເບັ້ຍລ້ຽງໃຫ້ 3 ເດືອນຕອນຮຽນ ແລະ 1 ເດືອນຫຼັງຈາກຮຽນຈົບ; ມີອຸປະກອນຮຽນໃຫ້. ພ້ອມນັ້ນ, ການຮຽນແມ່ນເນັ້ນປະຕິບັດໂຕຈິງ 80% ແລະ ບໍາລຸງພາສາອັງກິດວິຊາສະເພາະເພື່ອການສື່ສານໃຫ້ພ້ອມ.

ສຳລັບນ້ອງຄົນໃດສົນໃຈ ສາມາດມາເອົາຄຳຮ້ອງຂໍທຶນ ແລະ ເຂົ້າຮຽນໄດ້ ສະຖານທີ່ຕັ້ງຢູ່ ບ້ານ ດົງປ່າແຫຼບ, ເມືອງ ຈັນທະບູລີ, ນະຄອນຫຼວງວຽງຈັນ ໂທສອບຖາມໄດ້ເບີທີ 021 540545 & 021 261566 ວັນຈັນຫາວັນສຸກ ເວລາ 8:00 – 4:30 ເທົ່ານັ້ນ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *