ລາວ-ອິນເດຍ ຮ່ວມມືພັດທະນາຊັບພະຍາກອນມະນຸດ

ໃນວັນທີ 6 ກັນຍາທີ່ ກະຊວງການຕ່າງປະເທດ ໄດ້ມີພິທີເຊັນບົດບັນທຶກ ຄວາມເຂົ້າໃຈ (MoU) ຮ່ວມກັນລະຫວ່າງສະຖາບັນການ ຕ່າງປະເທດຂອງລາວ ແລະ ສະຖາບັນການຕ່າງປະເທດ ຂອງອິນເດຍ ກ່ຽວກັບການຮ່ວມມືດ້ານວຽກງານການຈັດຊຸດຝຶກອົບຮົມ, ການພັດທະນາຊັບພະຍາກອນມະນຸດ ແລະ ການຄົ້ນຄວ້າ ໃນຂະແໜງການຕ່າງປະເທດ. ໃຫ້ກຽດລົງນາມ ຝ່າຍລາວໂດຍທ່ານ ຄຳສວຍ ແກ້ວດາລາວົງ ຫົວໜ້າສະ ຖາບັນການຕ່າງປະເທດ ແລະ ຝ່າຍອິນເດຍ ໂດຍທ່ານ ດິນກາ ອັດທະນາ (DinkarAsthana) ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ອິນເດຍ ປະຈໍາ ສາທາລະນະລັດ ປະຊາທິປະໄຕ ປະຊາຊົນລາວ, ໂດຍຊ້ອງໜ້າແລະເປັນສັກຂີພິຍານຂອງທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດ, ຄະນະກົມຕ່າງໆຈາກກະຊວງການຕ່າງປະເທດ ຄະນະພະແນກ ແລະ ພະນັກງານວິຊາການຈາກສະຖາບັນການຕ່າງ ປະເທດ, ແລະ ຜູ້ຕາງໜ້າຈາກ ສະຖານເອກອັກຄະລັດຖະທູດ ອິນເດຍ ປະຈຳ ສປປ ລາວ ເຂົ້າຮ່ວມ.

ການເຊັນບົດບັນທຶກຄວາມ ເຂົ້າໃຈຄັ້ງນີ້ແມ່ນເປັນການສືບ ຕໍ່ພາຍຫຼັງການພົບປະກັນລະ ຫວ່າງທ່ານ ຄຳສວຍ ແກ້ວດາລາວົງ ຫົວໜ້າສະຖາບັນການຕ່າງປະເທດ ແລະ ທ່ານ ດິນກາ ອັດທະນາ (DinkarAsthana) ເອກອັກຄະລັດຖະທູດວິສາມັນຜູ້ມີ ອຳນາດເຕັມ ແຫ່ງ ສາທາລະນະລັດ ອິນເດຍ ປະຈໍາ ສປປ ລາວ, ໃນວັນທີ 13 ມິຖຸນາ 2019 ທີ່ສະຖາບັນການຕ່າງປະເທດ.

ຈຸດປະສົງແມ່ນເພື່ອສົ່ງເສີມການຮ່ວມມື ລະຫວ່າງ ສະຖາບັນການຕ່າງ ປະເທດຂອງລາວ ແລະ ສະຖາບັນການຕ່າງປະເທດຂອງ ອິນເດຍ ກ່ຽວກັບການສ້າງຂີດຄວາມອາດສາມາດ ໃນການປະຕິບັດວຽກງານຂອງສະຖາບັນການຕ່າງປະເທດ ເປັນຕົ້ນແມ່ນການຈັດຊຸດຝຶກອົບຮົມວຽກງານການທູດ, ວຽກງານການຄົ້ນຄວ້າ, ການສົ່ງເສີມ ແລະ ແລກປ່ຽນຊ່ຽວຊານ ແລະ ນັກຄົ້ນຄວ້າ.

ສປປ ລາວ ແລະ ສ.ອິນເດຍໄດ້ມີສາຍພົວພັນການທູດ ອັນຢາວນານ ເລີ່ມແຕ່ຊຸມປີ 1950 ເປັນຕົ້ນມາ, ອິນເດຍໄດ້ໃຫ້ການສະ ໜັບສະໜູນຢ່າງ ຕັ້ງໜ້າຢູ່ເວທີສາກົນ ໃນພາ ລະກິດການຕໍ່ສູ້ຂອງປະຊາຊົນລາວ ເພື່ອປົດປ່ອຍຕົນເອງ ເພື່ອຄວາມເປັນເອ ກະລາດແຫ່ງຊາດ ແລະ ອິດສະລະພາບໃນ ວັນທີ 2 ກຸມພາ 1956, ສອງ ປະເທດໄດ້ສ້າງຕັ້ງສາຍພົວພັນ ການທູດນຳກັນ ແລະ ມີການຮ່ວມມືຖານເພື່ອນມິດຕະຫຼອດມາ.

ພາຍຫຼັງ ສປປ ລາວ ໄດ້ຮັບ ການສະຖາປະນາ ປີ 1975, ການພົວພັນການທູດ ລະຫວ່າງ ສອງປະເທດໄດ້ຮັບການພັດ ທະນາຢ່າງຕໍ່ເນື່ອງ, ສອງຝ່າຍ ໄດ້ມີການແລກປ່ຽນການຢ້ຽມ ຢາມນຳກັນຢ່າງເປັນປົກກະຕິ ເພື່ອຮັບປະກັນໃຫ້ແກ່ການພົວພັນ ແລະ ຮ່ວມມືສອງຝ່າຍ, ໃນປີ 1997 ສອງປະເທດໄດ້ສ້າງຕັ້ງຄະນະກຳມາທິການຮ່ວມ ວ່າດ້ວຍການຮ່ວມມືສອງຝ່າຍ ສປປ ລາວ-ອິນເດຍ ໂດຍແມ່ນລັດຖະມົນຕີກະຊວງການຕ່າງປະເທດຂອງສອງປະເທດເປັນປະທານຮ່ວມ ຊຶ່ງທຸກໆສອງປີ ຈະຜັດປ່ຽນກັນເປັນເຈົ້າ ພາບ ແລະ ກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມືສອງຝ່າຍ ສປປ ລາວ-ອິນເດຍ ຄັ້ງທີ 9, ກໍໄດ້ຈັດຂຶ້ນໃນວັນທີ 23 ພະຈິກ 2018 ຜ່ານມາ ທີ່ນະຄອນຫຼວງວຽງຈັນ.

 

(ຂ່າວ: ສະຖາບັນການຕ່າງປະເທດ ກຕທ)

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *