ໂຮງຮຽນກຽດຕິສັກ ນານາຊາດ ພ້ອມທຸກດ້ານ ສຳລັບສົກຮຽນໃໝ່ 2019-2020

ໂຮງຮຽນ​ກຽດຕິ​ສັດ ນານາ​ຊາດ ​ເປັນ​ໂຮງຮຽນ​ທີ່​ນຳ​ໃຊ້​ຫລັກສູດ​ນານາ​ຊາດ ຂອງປະ​ເທດ​​ອັງ​ກິດ ​ໄປ​ຄຽງ​ຄູ່ກັບ​ຫລັກສູດ​ ການ​ຮຽນ-ການ​ສອນ​ແຫ່ງ​ຊາດ​ລາວ ​ເພື່ອ​ໃຫ້​ນັກຮຽນ​ສາມາດ ​ຮຽນ​ທັງ​ສອງ​ຫລັກສູດ​ໄປ​ພ້ອມໆ​ກັນ ​​ແລະ ​ໃນ​ສົກຮຽນ​ໃໝ່ 2019-2020 ນີ້ ທາງ​ໂຮງຮຽນ​ແມ່ນ​ມີ​ຄວາມ​ພ້ອມ​ ທຸກ​ດ້ານ​ໃນ​ການ​ກຳ​ເນີນ​ ການ​ຮຽນ​ການ​ສອນ ​​ໂດຍ​ສະ​ເພາະ​ແມ່ນ ດ້ານອຸປະກອນ​ການ​ຮຽນ-ການ​ສອນ, ຄູ​ອາຈານ​ສິດສອນ​ທີ່​ມີ​ປະສົບ​ການ, ມີ​ຫ້ອງ​ຮຽນ​ຮອງ​ຮັບ​ຢ່າງ​ພຽງພໍ ລວມ​ເຖິງ​ແຜນການ​ດຳ​ເນີນ ​ກິດຈະກຳ​ຕ່າງໆ​ໃນການ​ສິດສອນ ​ແລະ ອື່ນໆ.

ທ່ານ​ນາງ ຈັນ​ແດງ ​ແສງ​ວໍລະ​ວົງ ຮອງ​ອຳນວຍ​ການ​ໂຮງຮຽນ​ກຽດຕິ​ສັກ ນານາ​ຊາດ ​ໄດ້​ໃຫ້​ສຳພາດ​ຕໍ່​ສື່​ມວນ​ຊົນ​ໃນ​ວັນ​ທີ 2 ກັນຍາ 2019 ​ນີ້​ວ່າ: ໃນ​​ສົກຮຽນ​ໃໝ່ 2019-2020 ໂຮງຮຽນ​ກຽດຕິ​ສັກ ນານາ​ຊາດ ​ແມ່ນ​ມີ​ຄວາມ​ພ້ອມ​ໃນ​ທຸກ​ດ້ານ ​ສຳລັບ​ການ​ດຳ​ເນີນ ການ​ຮຽນ-​ການ​ສອນ ​ເນື່ອງ​ຈາກ​ວ່າ ກ່ອນ​ຈະ​ເປີດ​ສົກຮຽນ​ໃໝ່ 2 ອາທິດ​ແມ່ນ​ໃຫ້​ພະນັກງານ​ ມາ​ປະຈຳການ​ຢູ່​ໂຮງຮຽນ​ກ່ອນ ​ເພື່ອ​ກວດກາ​ຄວາມ​ພ້ອມ​ທາງ ​ດ້ານ​ອຸປະກອນ​ຕ່າງໆ, ສ່ວນ​ຄູ​ອາຈານ​ ​ແມ່ນ​​ມາເຮັດ​ນິ​ເທດ ກ່ຽວ​ກັບວິທີ​ການ​ສອນ, ການ​ແຕ່ງ​ບົດ​ສອນ, ​ເຕັກນິກ​ການ​ສົ່ງ​ຄວາມ​ຮູ້ ​ໃຫ້​ນັກຮຽນ​ໃນ​ແຕ່ລະ​ເກນ​ອາຍຸ ​ແລະ ​ໄດ້​ມີ​ການ​ຖອດ​ຖອນ​ບົດຮຽນ​ຮ່ວມ​ກັນ​ ໃນ​ການ​ເຄື່ອນ​ໄຫວ​ໃນ​ປີຜ່າ​ນມາ ​ເຮົາ​ມີ​ຂໍ້​ບົກ​ຜ່ອງ​ຫຍັງ ​ແລະ ​ໃນ​ປີ​ນີ້​ແມ່ນ​ໄດ້​ເອົາມາ​ເຂົ້າ​ໃນ​ແຜນການ​ລວມຂອງ​ໂຮງຮຽນ ວ່າ​ຈຸດ​ໃດ​ທີ່​ເຮົາ​ຄວນ​ພັດທະນາ ​ແລະ ປັບປຸງ​ໃຫ້​ດີ​ຂຶ້ນ, ​ເຊິ່ງ​ໃນສົກ​ປີ​ນີ້ ມີ​ນັກຮຽນ ​ທີ່​ມີ​ລົງທະບຽນ​ຮຽນ​ແລ້ວ 1.300 ກວ່າ​ຄົນ ລວມທັງ​ຊັ້ນ​ອະນຸບານ, ປະຖົມ ​ແລະ ມັດທະຍົມ.

​​
ທ່ານ​ນາງ ຈັນ​ແດງ ​ແສງ​ວໍລະ​ວົງ ຍັງ​ໃຫ້​ຮູ້​ອີກ​ວ່າ: ໂຮງຮຽນ​ກຽດຕິ​ສັດ ນານາ​ຊາດ ​ໄດ້ເລີ່​ມດຳ​ເນີນ​ການ​ຮຽນ-ການ​ສອນ ​ມາ​ແຕ່​ປີ 1992 ​ແລະ ສາມາດ​ສິດສອນ​ນັກຮຽນ​ໄດ້​ຫລາຍ​ພັນ​ຄົນ, ​ເຊິ່ງ​ໃນ​ແຕ່ລະ​ປີ ທາງ​ໂຮງຮຽນ​ໄດ້​ມີ​ການ​​ເກັບກຳຂໍ້​ມູນ​
 ຂອງ​​ນັກຮຽນ​ແຕ່ລະຄົນ​ທີ່​ຈົບ​ອອກ​ໄປ ​ແລະ ໄປ​ສຶກສາ​ຕໍ່​ຢູ່​ສະ​ຖາ​ບັນ​ການ​ສຶກສາ​ແຫ່ງ​ຕ່າງໆ ​ທັງ​ພາຍ​ໃນ ​ແລະ ຕ່າງປະ​ເທດ ​ເພື່ອ​ຕິດຕາມ​ເບິ່ງ​ຜົນ​ການ​ຮຽນ​ ຂອງ​ຜູ້ກ່ຽວ​ເປັນ​ແນວ​ໃດ, ສະພາບ​ແວດ​ລ້ອມ​ຂອງ​ໂຮງຮຽນ​ເປັນ​ແນວ​ໃດ, ພ້ອມ​ທັງ​ປະສານ​ຫາ​ໂຮງຮຽນ​ ທີ່​ນັກຮຽນ​ໄປ​ຮຽນ​ຕໍ່​ນັ້ນ ​ເພື່ອ​ໃຫ້​ເຂົາ​ເຈົ້າ​ລາຍ​ງານ​ ວ່າ​ນັກຮຽນ​ຂ້ອຍ​ເປັນ​ແນວ​ໃດ ​ເລື່ອງ​ຄຸນສົມບັດ, ຄວາມ​ເອົາ​ໃຈ​ໃສ່​ໃນ​ການ​ຮຽນ​ເປັນ​ແນວ​ໃດ ​ເພື່ອ​ຈະ​ປະ​ເມີນ​ເບິ່ງ​ວ່າ​ນັກຮຽນ​ທີ່​ຮຽນ​ຈົບ​ຈາກ ໂຮງຮຽນ​ກຽດຕິ​ສັດ ນານາ​ຊາດ ສາມາດ​ສືບ​ຕໍ່​ຢູ່​​ໂຮງຮຽນນັ້ນ​ໄດ້​ດີ​ບໍ່ ຫລື ບໍ່​ໄດ້​ດີ ທັງ​ນີ້ ກໍ​ເພື່ອ​ນຳ​ມາ​ເປັນ​ຂໍ້​ມູນ​ ໃຫ້​ແກ່​ນັກຮຽນ​ໃນ​ຮຸ່ນ​ຕໍ່​ໄປ.

 

ແຫຼ່ງຂ່າວ: ຂປລ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *