ຊົນລະປະທານ​ນໍ້າ​ມະ​ອຸ່ນ​ເມືອງ​ສິງ ສະໜອງ​ນໍ້າຫົດເນື້ອ​ທີ່​ນາປີ 2.400 ເຮັກຕາ

ໂຄງການ​ ຊົນລະປະທານ ​ນໍ້າ​ມະ​ອຸ່ນ ​ແມ່ນ​ໂຄງການ​ໜຶ່ງ ທີ່​ສ້າງ​ຄວາມ​ເຂັ້ມ​ແຂງ ​ໃຫ້​ແກ່​ທົ່ງພຽງ​ເມືອງ​ສິງ ​ໂດຍ​ສະ​ເພາະ​ແມ່ນ​ສະໜອງ​ນໍ້າ​ເຂົ້າ​ໃນ​ການ​ຜະລິດ​ກະສິກໍາປູກຝັງ-ລ້ຽງສັດ ​ເປັນ​ໂຄງ ການ​ທີ່​​ປະຊາຊົນ​ໄດ້​ຮັບ​ຜົນ​ປະ​ໂຫຍ​ດສູງ​ສຸດ, ​ຊົນລະປະທານ ດັ່ງກ່າວ ​ສາມາດ ​ສະໜອງ​ນໍ້າ ​ຫົດ​ເນື້ອ​ທີ່​ນາ​ ​ໃນ​ລະດູຝົນ​ໄດ້ 2.400 ​ເຮັກຕາ ​ແລະ ​ໃນ​ລະດູ​ແລ້ງ 900 ​ເຮັກຕາ ​ເຊິ່ງກວມ​ເອົາ​ເກືອບ ​ເຄິ່ງ​ໜຶ່ງຂອງ​ເນື້ອ​ທີ່​ນາ​ເຂດ​ທົ່ງພຽງ​ເມືອງ​ສິງ,

ທ່ານ ສົມລິດ ພອນປະເສີດ ຫົວໜ້າຫ້ອງການກະສິກໍາ ແລະ ປ່າໄມ້ເມືອງສິງ ​​ໄດ້ໃຫ້​ຮູ້​​ວ່າ: ຊົນລະປະທານ​ນໍ້າ​ມະ​ອຸ່ນ ​ແມ່ນ​ຊົນລະປະທານ​​ໃຫ່ຍ ຢູ່​ແຂວງ​ຫຼວງ​ນໍ້າ​ທາ ກໍ​ຄື​​ ເມືອງ​ສິງ ພາຍຫລັງ​ໄດ້​ຮັບ​ການ​ກໍ່ສ້າງ​ສໍາ​ເລັດ ​ແລະ ​ເປີດ​ນໍາ​ໃຊ້ໃນເດືອນ 6 ປີ 2019, ສາມາດຕອບສະຫນອງນ້ຳໃສ່ເນື້ອທີ່ນາຂອງປະຊາຊົນຊາວເມືອງສິງໄດ້ຢ່າງພຽງພໍ, ນອກຈາກ​ຊົນລະປະທານ​ນໍ້າ​ມະ​ອຸ່ນ​ແລ້ວ ຢູ່​ເມືອງ​ສິງ​ຍັງ​ມີ​ຊົນລະປະທານ​ແຫ່ງ​ຕ່າງໆ​ທັງ​ໝົດ 463 ​ແຫ່ງ ສາມາດ​ຫົດ​ເນື້ອ​ທີ່​ນາກ​ວມ​ເອົາ 40,6% ຂອງ​ເນື້ອ​ທີ່​ນາ​ທັງ​ໝົດ 5.900 ​ເຮັກຕາ.

ທ່ານ ສົມລິດ ພອນປະເສີດ ຍັງ​ໃຫ້​ຮູ້​ອີກ​ວ່າ: ​ເພື່ອ​ເປັນ​ການ​ຊຸກຍູ້​ໃຫ້​ແກ່​ຂະ​ບວນການ​ຜະລິດ​ເຂົ້ານາ​ປີໆ​ນີ້​ໃຫ້​ທັນຕາ​ມລະດູ​ການ, ຫ້ອງການກະສິກໍາ ແລະ ປ່າໄມ້ເມືອງສິງ ​ໄດ້​ແຕ່ງ​ຕັ້ງ​ພະນັກງານ​ລົງ​ຊຸກຍູ້​ສົ່ງ​ເສີມ​ການ​ຜະລິດ​ເຂົ້ານາ​ປີ ​ລົງ​ຕິດຕາມ​ຢູ່ 3 ຈຸດ​ໃຫຍ່ຄື: ຈຸດ​ນາ​ທົ່ງ​ຫລວງ ທີ່​ນໍາ​ໃຊ້​ຊົນລະປະທານ​ຝາຍ​ບ້ານ​ກຸ່ມ, ຈຸດ​ນາ​ປາງ ທົ່ງ​ບ້ານ​ປຸ່ງ​ກອກ ທີ່​ນໍາ​ໃຊ້​ຊົນລະປະທານ​ຝາຍ​ບ້ານ​ສົບ​ອິ ​ແລະ ຈຸດ​ ນາ​ເຂດ​ທົ່ງ​ດົງ​ເມົາ ທີ່​ນໍາ​ໃຊ້​ຊົນລະປະທານ​ນໍ້າ​ມະ​ອຸ່ນ. ສ່ວນແນວພັນເຂົ້າທີ່ປະຊາຊົນ ນິຍົມປູກຫລາຍແມ່ນເຂົ້າອ່ານນ້ອຍ, ເຂົ້າຈ໋າແຈ໋ວ, ເຂົ້າຫອມຫຍາບ, ເຂົ້າໝູຢອມ ແລະ ເຂົ້າທ່າດອກຄຳ11.

 

ແຫຼ່ງຂ່າວ: ຂປລ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *