ມອບ – ຮັບໜ້າທີ່ປະທານແນວລາວສ້າງຊາດ ເມືອງໄຊຍະບູລີ

ພິທີມອບ – ຮັບໜ້າທີ່ປະທານແນວລາວສ້າງຊາດ ເມືອງໄຊຍະບູລີ ລະຫວ່າງຄົນເກົ່າ ແລະ ຄົນໃໝ່ ຈັດຂຶ້ນໃນວັນທີ 2 ກັນຍາ 2019 ນີ້ ທີ່ຫ້ອງປະຊຸມຫ້ອງວ່າການເມືອງ ໂດຍເປັນກຽດເຂົ້າຮ່ວມຂອງ ທ່ານ ຄໍາສິງ    ສໍລະສຸກ ຄະນະປະຈໍາພັກແຂວງ, ປະທານແນວລາວສ້າງຊາດແຂວງ; ທ່ານ ບຸນແທນ ທີແກ້ວ ກໍາມະການພັກແຂວງ, ເລຂາພັກເມືອງ, ເຈົ້າເມືອງໄຊຍະບູລີ; ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການ ແລະ ແຂກຖືກເຊີນເຂົ້າຮ່ວມ.

ໃນພິທີ ທ່ານ ຄໍາຜາຍ ແກ້ວບົວ ຮອງເລຂາພັກເມືອງ ປະທານແນວລາວສ້າງຊາດເມືອງຜູ້ເກົ່າ ໄດ້ຂຶ້ນຜ່ານບົດບັນທຶກການປະຕິບັດໜ້າທີ່ວຽກງານແນວລາວສ້າງຊາດໃນໄລຍະຜ່ານມາ, ຫ້ອງການແນວລາວສ້າງຊາດ ເມືອງໄຊຍະບູລີ ປະກອບມີ 4 ໜ່ວຍງານ ຄື: ໜ່ວຍງານບໍລິຫານຈັດຕັ້ງ, ໜ່ວຍງານກວດກາ, ໜ່ວຍງານໂຄສະນາອົບຮົມ ແລະ ໜ່ວຍງານສາສະໜາຊົນເຜົ່າ, ຊັ້ນຄົນອົງການຈັດຕັ້ງສັງຄົມ ປະກອບມີພະນັກງານ 11 ຄົນ ຍິງ 6 ຄົນ. ໃນນີ້, ອາສາສະໝັກ 3 ຄົນ ຍິງ 2 ຄົນ, ໄດ້ສັບຊ້ອນພະນັກງານເຂົ້າຕາມໜ້າທີ່ວຽກງານ ໃນປີ 2019, ໄດ້ຮັບງົບປະມານບໍລິຫານ 16 ລ້ານກີບ, ເງິນສົ່ງເສີມ 2.900.000 ກີບ, ຖອນມາຮັບໃຊ້ວຽກບໍລິຫານ 14 ລ້ານ 9 ແສນກີບ ຍັງເຫຼືອ 4 ລ້ານກີບ ແລະ ໄດ້ສ້າງກິດຈະກໍາໂຄງການກໍ່ສ້າງຂັ້ນໄດຂຶ້ນວັດພູທອກ ເມືອງໄຊຍະບູລີ ມີ 344 ຂັ້ນ ມູນຄ່າການກໍ່ສ້າງ 687 ລ້ານກວ່າກີບ ສໍາເລັດ 100% ແລະ ກິດຈະກໍາໂຄງການກໍ່ສ້າງໂຕນາກຂັ້ນໄດຂຶ້ນວັດພູທອກ ຈໍານວນ 8 ໂຕ ມູນຄ່າ 160 ລ້ານກີບ, ສໍາເລັດແລ້ວ 4 ໂຕ ແລະ ໄດ້ຊໍາລະເງິນແລ້ວ 2 ໂຕ ມູນຄ່າ 40 ລ້ານກີບ.

ສ່ວນທິດທາງຕໍ່ໜ້າແມ່ນຈະໄດ້ສືບຕໍ່ນໍາເອົາຜົນສໍາເລັດກອງປະຊຸມໃຫຍ່ ຄັ້ງທີ 5 ຂອງແນວລາວສ້າງຊາດເມືອງ ໄປເຊື່ອມຊຶມໃຫ້ ແນວລາວສ້າງຊາດຢູ່ຮາກຖານບ້ານ, ສືບຕໍ່ກໍ່ສ້າງໂຕນາກຂຶ້ນຂັ້ນໄດວັດພູທອກ, ສືບຕໍ່ວຽກງານຂະບວນການຄອບຄົວ ແລະ ບ້ານສາມັກຄີປອງດອງພາຍໃນເມືອງໄຊຍະບູລີ.

ຈາກນັ້ນ, ໃນພິທີກໍໄດ້ເຊັນບົດບັນທຶກມອບ – ຮັບໜ້າທີ່ລະຫວ່າງ ທ່ານ ຄໍາຜາຍ ແກ້ວບົວ ປະທານແນວລາວສ້າງຊາດຜູ້ເກົ່າ ແລະ ທ່ານ ສົມບັດ ຈະເລີນມີໄຊ ປະທານແນວລາວສ້າງຊາດຜູ້ໃໝ່ ໂດຍຊ້ອງໜ້າ ທ່ານ ຄໍາສິງ ສໍລະສຸກ ຄະນະປະຈໍາພັກແຂວງ, ປະທານແນວລາວສ້າງຊາດແຂວງ; ທ່ານ ບຸນແທນ ທີແກ້ວ ກໍາມະການພັກແຂວງ, ເລຂາພັກເມືອງ, ເຈົ້າເມືອງໄຊຍະບູລີ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

 

( ໂດຍ: ວັນທອງ )

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *