ລັດຖະມົນຕີປະຈຳ ສນຍ ລົງຊຸກຍູ້ ການຜະລິດຢູ່ແຂວງຊຽງຂວາງ

ທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ (ສນຍ) ພ້ອມຄະນະ ໄດ້ໄປຢ້ຽມຢາມການຜະລິດຂອງ ປະຊາຊົນຢູ່ເມືອງຄູນ ແລະ ເມືອງຜາໄຊ ແຂວງຊຽງຂວາງ ໃນວັນທີ 31 ສິງຫາ-1 ກັນຍານີ້ ໂດຍມີທ່ານ ບຸນຕົ້ນ ຈັນທະພອນ ເຈົ້າແຂວງໆຊຽງຂວາງ ພ້ອມດ້ວຍຄະນະໃຫ້ການຕ້ອນຮັບ.

ການເຄື່ອນໄຫວ ແລະ ເຮັດວຽກຢູ່ແຂວງຊຽງຂວາງຄັ້ງນີ້ ທ່ານຈະເລີນ ເຢຍປາວເຮີ ພ້ອມຄະນະໄດ້ລົງຢ້ຽມຢາມ ແລະ ຊຸກຍູ້ການຜະລິດຂອງປະຊາຊົນ ຢູ່ບ້ານນາຫໍ້ ເມືອງຄູນ, ບ້ານຫໍສິມຖ້ຳພຸກ ເມືອງຜາໄຊ ໄດ້ຢ້ຽມຢາມຄອບຄົວທ່ານ ວັນທອງ ພອນມີໄຊ ຮອງອຳນວຍການໂຮງຮຽນປະຖົມສົມບູນບ້ານໜອງ ຊຶ່ງເປັນໜຶ່ງໃນຄອບຄົວຕົວແບບໃນການລ້ຽງສັດໃຫຍ່ ຂອງເມືອງຜາໄຊ.

ທ່ານ ວັນທອງ ພອນມີໄຊ ລາຍງານວ່າ: ການລ້ຽງງົວທອມ ຫາກໍເລີ່ມໃນປີ 2018 ໂດຍເບື້ອງຕົ້ນໄດ້ຮັບການຊ່ວຍເຫຼືອຈາກພາກລັດ ເປັນຕົ້ນແມ່ນ ໜາມໝາກຈັບ, ສັງກະສີ ລວມທັງໄດ້ຮັບການຝຶກອົບຮົມເຕັກນິກການປູກ-ການລ້ຽງ, ການປິ່ນປົວພະຍາດ, ຫຼັງຈາກນັ້ນກໍໄດ້ຊື້ງົວມາລ້ຽງ (ລ້ຽງແບບທອມງົວ) ແລະ ໄດ້ຂາຍງົວ 9 ໂຕໃນທ້າຍປີ 2018 ສ້າງລາຍຮັບໃຫ້ຄອບຄົວ 52 ລ້ານກ່ວາກີບ, ໃນຂະນະທີ່ງົວທີ່ຊື້ມາລ້ຽງຈຳນວນໜຶ່ງກໍໄດ້ເກີດແມ່ແຜ່ລູກອອກ, ມາຮອດປີ 2019 ນີ້ໄດ້ຂາຍງົວທອມ 8 ໂຕ, ສ້າງລາຍຮັບ 56 ລ້ານກ່ວາກີບ ນອກນີ້ ຍັງໄດ້ຂາຍແນວພັນຫຍ້າໃຫ້ປະຊາຊົນຜູ້ທີ່ສົນໃຈປູກຫຍ້າລ້ຽງງົວ. ທ່ານກ່າວອີກວ່າ: ປັດ ຈຸບັນຄອບຄົວຂອງຕົນໄດ້ປູກຫຍ້າລ້ຽງງົວມີ 3 ສາຍພັນຄື: ຫຍ້າລູຊີ, ລີເປຍ ແລະ ຫຍ້າໂກເຕມາລາ ມີເນື້ອທີ່ປູກຫຍ້າທັງໝົດ 4 ເຮັກຕາ ນອກນີ້ ຍັງໄດ້ລ້ຽງປາ, ສັດປີກ, ປູກເຂົ້າໄກ່ນ້ອຍ ຂາຍເປັນສິນຄ້າ, ຊຶ່ງໄລຍະຜ່ານມາກໍເຄີຍຖ່າຍທອດຄວາມຮູ້, ບົດຮຽນ ແລະ ປະສົບການໃຫ້ແກ່ ຊາວບ້ານຜູ້ທີ່ສົນໃຈໃນການປູກ-ການລ້ຽງ ແລະ ບາງຄົນກໍນຳເອົາບົດຮຽນດັ່ງກ່າວໄປທົດລອງປູກ-ລ້ຽງ ເພື່ອສ້າງເສດຖະກິດຄອບຄົວ.

ໂອກາດນີ້ ທ່ານລັດຖະ ມົນຕີປະຈຳສຳນັກງານນາ ຍົກລັດຖະມົນຕີ ໄດ້ໂອ້ລົມຕໍ່ຄອບຄົວດັ່ງກ່າວ ໂດຍໄດ້ເນັ້ນໃຫ້ຂະຫຍາຍການ ປູກຫຍ້າ, ການລ້ຽງສັດໃຫຍ່ກາຍເປັນສິນຄ້າຫຼາຍຂຶ້ນ, ໃນຂະນະດຽວກັນຄອບຄົວອື່ນໆພາຍໃນບ້ານ ແລະ ບ້ານອື່ນໆ ກໍຄວນມາສຶກ ສາຊອກຮູ້ ແລະ ຖອດຖອນບົດຮຽນການປູກ-ການລ້ຽງກັບຄອບຄົວດັ່ງກ່າວນີ້ ຫຼື ໄປຖອດຖອນບົດຮຽນກັບຄອບຄົວຕົວແບບ ອື່ນໆ ເພື່ອນຳເອົາບົດຮຽນ ແລະ ປະສົບການໄປພັດທະນາເສດຖະກິດຄອບຄົວຂອງຕົນໃຫ້ດີຂຶ້ນ, ນອກຈາກນີ້ ທ່ານ ຈະເລີນ ເຢຍປາວເຮີ ຍັງໄດ້ເນັ້ນໃຫ້ເຝົ້າລະວັງການລະບາດຂອງພະຍາດ, ຮັກສາມູນເຊື້ອຄວາມດຸໝັ່ນຂະຫຍັນພຽນ, ເອື້ອເຟື້ອເຜື່ອແຜ່, ສູ້ຊົນສ້າງສາພັດທະນາເສດຖະກິດຂອງຄອບຄົວໃຫ້ເຂັ້ມແຂງ ຮັ່ງມີຂຶ້ນເລື້ອຍໆ.

(ຂ່າວ: ບຸນມີ ແສງທຸມມີ)

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *