ຮູ້ຈັກ ປ້າບົວແກ້ວ ດາລາລອຍ ຕົວລະຄອນຫລັກໃນຮູບເງົາເລື່ອງ “ດອກຈຳປາບານ”

ຂໍແນະນໍາຕົວລະຄອນຫລັກໃນຮູບເງົາເລື່ອງ “ດອກຈຳປາບານ” ຄື ທ່ານ ປ້າບົວແກ້ວ ດາລາລອຍ ( ທ່ານ ປ້າ ບົວແກ້ວ ສຸດາຈັນ ) ເຊີ່ງເປັນພັນລະຍາ ທ່ານ ດຣ. ປອນເມກ ດາລາລອຍ ອາດີດ ຄະນະລັດຖະມົນຕີວ່າການ ກະຊວງສາທາລະນະສຸກ ນັ້ນເອງ ເພີ່ນເກີດເມື່ອວັນທີ່ 02 ຕຸລາ 1939, ທີ່ ບ້ານໂພນເຮືອງ ເມືອງຫລວງພະບາງ ແຂວງນະຄອນຫລວງພະບາງ ພາຍຫລັງຈົບປະຖົມ ແລະ ມັດທະຍົມຕອນຕົ້ນທີ່ຫລວງພະບາງແລ້ວ ເພີ່ນໄດ້ມາຮຽນຕໍ່ທີ່ອຸດົມວຽງຈັນ ( ມສ ວຽງຈັນ ).

ປີ 1959 ໄດ້ໄປຮຽນແພດຢູ່ທີ່ປະເທດຝຣັ່ງ (ສາຂາປະດົງຄັນ) ແລະ ໄດ້ແຕ່ງງານກັບ ທ່ານ ດຣ. ປອນເມກ ດາລາລອຍ ເຊີ່ງເພີ່ນໄດ້ມີລູກຊາຍນຳກັນສອງຄົນຢູ່ທີ່ນັ້ນ. ປີ 1967 ຄອບຄົວຂອງເພີ່ນໄດ້ກັບຄືນມາປະເທດລາວ, ທ່ານ ປ້າ ບົວແກ້ວ ດາລາລອຍ ໄດ້ໄປປະຈຳການທີ່ເມືອງວຽງໄຊ ຮັບຕຳແໜ່ງເປັນ “ຫົວໜ້າພະແນກການປະຕິວັດ” ທີ່ເຂດປົດປ່ອຍເມືອງວຽງໄຊ ເປັນໄລຍະເວລາ 10 ປີ ແລະ ໄດ້ເກີດລູກສາວຜູ້ສຸດທ້ອງຢູ່ທີ່ນັ້ນ.

ປີ 1975 ພາຍຫລັງປະເທດຊາດໄດ້ຮັບການປົດປ່ອຍ ເພີ່ນໄດ້ຍົກຍ້າຍຄອບຄົວເຂົ້າສູ່ນະຄອນຫລວງວຽງຈັນ, ເຊີ່ງໃນຕອນນັ້ນໄດ້ຍ້າຍມາປະຈຳການຢູ່ທີ່ “ກະຊວງສາທາລະນະສຸກ ໄດ້ຮັບຕຳແໜ່ງເປັນຫົວໜ້າກົມ ພະແນກແມ່ ແລະ ເດັກ”, ຫລັງຈາກນັ້ນ ປີ 1977 ໄດ້ຍ້າຍໄປປະຈຳການຢູ່ທີ່ “ສູນກາງຊາວໜຸ່ມ ປະຊາຊົນ ປະຕິວັດລາວ ໄດ້ຮັບຕຳແໜ່ງເປັນຫົວໜ້າພະແນກການຕ່າງປະເທດ” ເປັນໄລຍະເວລາ 10 ປີ, ຕໍ່ມາໄດ້ຍ້າຍມາປະຈຳການຢູ່ທີ່ “ສູນວິທະຍາສາດ-ເຕັກໂນໂລຊີ ຫົວໜ້າຂ່າວ-ສານ ວິທະຍາສາດເຕັກນິກ” ເປັນເວລາ 1 ປີ,

ພາຍຫລັງ ທ່ານ ດຣ. ປອນເມກ ດາລາລອຍ ໄດ້ຮັບຕຳແໜ່ງເປັນເອກອັກຄະລະສະທູດ ສປປ ລາວ ໄປປະຈຳການທີ່ປະເທດກູບາ ເຊີ່ງພັນລະຍາຂອງເພີ່ນ ( ທ່ານ ປ້າ ບົວແກ້ວ ດາລາລອຍ ) ກໍໄດ້ຕິດຕາມໄປປະຈຳຢູ່ທີ່ນັ້ນເຊັ່ນກັນ, ຕໍ່ມາໄດ້ຍ້າຍມາປະຈຳການຢູ່ທີ່ເອກອັກຄະລະສະທູດທີ່ ສປປ ຈີນ (ປັກກິ່ງ), ສປປ ເກົາຫລີ ຈົນເຖີງປິ 1996.

ໃນປີ 1998 ທ່ານ ປ້າ ບົວແກ້ວ ດາລາລອຍ ໄດ້ໝົດກະສຽນ ແລະ ອອກບຳນານຈົນເຖິງປັດຈຸບັນ. ທີ່ສຳຄັນແມ່ນເພີ່ນໄດ້ຮ່ວມສະແດງຮູບເງົາທີ່ມີຄວາມໝາຍຄວາມສຳຄັນໃນຄັ້ງປະຫວັດຂອງການຮ່ວມມືກັນສ້າງເພື່ອສາຍພົວພັນທາງການທູດຄົບຮອບ 55 ປີ ລະຫວ່າງສອງຊາດລາວ-ຈີນ,

ທ່ານ ປ້າ ບົວແກ້ວ ດາລາລອຍ ເປັນຍິງຄົນໜື່ງທີ່ມີຄວາມເຂົ້າໃຈເລື່ອງຄວາມເປັນມາຂອງປະຫວັດສາດທີ່ເລິກເຊີ່ງ ແລະ ເພີ່ນຍັງສາມາດເວົ້າສື່ສານພາສາຈີນໄດ້ອີກດ້ວຍ (ເອີ້ນໄດ້ວ່າເກັ່ງຮອບດ້ານແທ້ໆ) ເຊີ່ງເພີ່ນໄດ້ຮັບບົດສະແດງເປັນແມ່ຕູ້ຂອງນາງເອກ (ຈຳປາ) ທີ່ໄດ້ແຕ່ງງານກັບທະຫານຊາວຈີນຄົນໜື່ງ ແຕ່ຍ້ອນຕອນນັ້ນພວມຢູ່ໃນລະຫວ່າງບ້ານເມືອງມີສົງຄາມ ຈື່ງໄດ້ເຮັດທັງສອງໄດ້ພັດພາກຈາກກັນ ຈົນເຮັດໃຫ້ຜູ້ເປັນລູກສາວພຽງອາຍຸ 5 ປີໃນຕອນນັ້ນ (ແມ່ຈຳປາ) ມີຄວາມຄຽດແຄ້ນໃຫ້ກັບພໍ່ ທີ່ຖືກພໍ່ປະຖີ້ມຕັ້ງແຕ່ນ້ອຍ ຈື່ງເປັນເຫດເຮັດໃຫ້ຄວາມຮັກຂອງລຸ້ນຫລານສາວມີບັນຫາໃນປັດຈຸບັນ.

 

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *