ນັກຮຽນຊົນເຜົ່າ ເມືອງສະໜາມໄຊ ອັດຕະປື ໄດ້ຮັບຫໍພັກຫຼັງໃໝ່ ຫຼັງຕ້ອງຍ່າງໄກ 15-25 ກິໂລແມັດ

ໂຮງຮຽນມັດທະຍົມຕອນຕົ້ນບ້ານປາກບໍ ກຸ່ມບ້ານປາກບໍ ເມືອງສະໜາມໄຊ ແຂວງອັດຕະປື ມີນັກຮຽນຈາກ 7 ບ້ານຄື: ບ້ານແບ່ງວິໄລ, ດອນ, ໂພນສະອາດ, ຈັນຕໍ, ກະແສະ, ປາກບໍ ແລະ ໜອງແຂ້ ​ເຊິ່ງເປັນບ້ານຊົນເຜົ່າຢຸ ແລະ ລະເວນ ທີ່ຕ້ອງເດີນທາງ​ໃນ​ເສັ້ນທາງ​ທຸລະກັນດານ 15-25 ກິໂລແມັດ ​ເພື່ອ​ມາ​ເຂົ້າຮຽນ ​ໂດຍນັກຮຽນບາງຄົນກໍກໍ່ສ້າງຫໍພັກຊົ່ວຄາວເອງ ​ເຊິ່ງມີ​ຄວາມ​ຫຍຸ້ງຍາກ ​ແລະ ເປັນສາເຫດເຮັດໃຫ້ນັກຮຽນຈໍານວນຫຼາຍປະລະການຮຽນ ຍ້ອນຂາດທີ່ພັກອາໄສ. ກອງປະຊຸມວາງແຜນພັດນາຂັ້ນກຸ່ມບ້ານປາກບໍ 5 ບ້ານ ພາຍໃນກຸ່ມບ້ານ ທີ່​ຈັດ​ຂຶ້ນທ້າຍປີ 2018 ຈຶ່ງຕົກ ລົງກໍ່ສ້າງຫໍພັກນັກຮຽນມັດທະຍົມກຸ່ມບ້ານປາກບໍ 1 ຫຼັງ ຂະໜາດ 9×16 ແມັດ ປະກອບ​ມີ 2 ຫ້ອງນອນ ຂະໜາດ 7×8 ແມັດ, ​ແຕ່ລະຫ້ອງນອນ ມີ 12 ຕຽງ, ນໍ້າບາດານຍົກສູງ 1 ບໍ່, ຫ້ອງນໍ້າ 2 ຫ້ອງ, ສາມາດບັນຈຸນັກ ຮຽນໄດ້ 60 ຄົນ ເປັນບຸລິມະສິດທໍາອິດຂອງກຸ່ມບ້ານໃນປີ 2019.

ການກໍ່ສ້າງຫໍພັກດັ່ງກ່າວ ໄດ້ເລີ່ມແຕ່ວັນທີ 15 ເມສາ 2019 ແລະ ສໍາເລັດວັນທີ 26 ກໍລະກົດ 2019 ມູນຄ່າ 336 ລ້ານກວ່າກີບ ​ເຊິ່ງປະຊາຊົນໄດ້ປະກອບສ່ວນແຮງງານ, ໄມ້ແບບ ແລະ ໄມ້ຄໍ້າແບບ, ໄຟຟ້າເຂົ້າຫໍພັກ, ອະນາໄມສະຖານທີ່ ຄິດ​ເປັນມູນຄ່າ 24 ລ້ານກວ່າກີບ.

ສໍາລັບສົກຮຽນ 2019-2020 ຄາດວ່າຈະມີນັກຮຽນເພີ່ມຂຶ້ນ​ເປັນ 180 ກວ່າຄົນ ຈາກ 125 ຄົນ ໃນເມື່ອກ່ອນ. ການກໍ່ສ້າງຫໍ​ພັກດັ່ງກ່າວ ເປັນປັດໄຈໜຶ່ງໃນການສົ່ງເສີມຊຸກຍູ້ດ້ານການສຶກສາໃຫ້ນັກຮຽນ​ຢູ່​ເຂດຊົນນະບົດ ​ໃຫ້ມີໂອກາດຮໍ່າຮຽນເອົາຄວາມຮູ້ ເພື່ອພັດທະນາຕົນເອງ ​ແລະ ຈະເປັນເງື່ອນໄຂສະດວກໃຫ້ນັກຮຽນຮຸ່ນຕໍ່ໄປ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *