ຮູ້ໂຕ ຫຼື ບໍ່? ເຮົາອາດກຳລັງກິນ “ພລາສຕິກຂະໜາດນ້ອຍ”

ເຊິ່ງໜັກເທົ່າກັບບັດເຄຣດິດໃນແຕ່ລະອາທິດ ເມື່ອວັນພະຫັດທີຜ່່ານມາ (22 ສິງຫາ) ອົງການອະນາໄມ​ໂລກ (WHO) ລາຍ​ງານ​ວ່າ​ໄມ​ໂຄຣພລາສຕິກ (microplastic) ຫຼື ພລາສຕິກ​ທີ່​ມີ​ເສັ້ນ​ຜ່ານ​ສູນ​ກາງ​ຂະໜາດ​ນ້ອຍ​ກວ່າ 5 ມິນ​ລິ​ແມັດ ຊຶ່ງ​ປະ​ປົນ​ຢູ່ໃນ​ນ້ຳ​ທີ່​ເຮົາ​ດື່ມ ຍັງ​ບໍ່​ຖື​ວ່າ​ເປັນ​ອັນຕະລາຍ​ຕໍ່​ສຸຂະພາບ​ໃນ​ຂະນະ​ນີ້.

“ຂໍ້​ມູນ​ອັນ​ຈຳ​ກັດ​ທີ່​ເຮົາ​ມີ​ຕອນ​ນີ້​ຊີ້​ວ່າ​ໄມ​ໂຄຣພລາສຕິກ​ໃນ​ນ້ຳ​ດື່ມ​ຍັງ​ບໍ່​ເປັນ​ອັນຕະລາຍ​ຕໍ່​ສຸຂະພາບ​ໃນ​ຕອນ​ນີ້ ແຕ່​ເຮົາ​ຍັງ​ຄົງ​ຕ້ອງ​ສຶກ​ສາ​ກັນ​ຕໍ່ໄປ ຮວມທັງ​ຕ້ອງ​ຢຸດຢັ້ງ​ການ​ປົນ​ເປື້ອນ​ຂອງພລາສຕິກ​ທົ່ວ​ໂລກອີກ​ດ້ວຍ”, ດຣ​. ມາ​ເຣຍ ເນ​ຣາ ຜູ້​ອຳ​ນວຍ​ການ​ສຳ​ນັກ​ງານ​ສາທາລະນະສຸກ, ສິ່ງ​ແວດ​ລ້ອມ ແລະ​ປັດ​ໄຈ​ສັງຄົມ​ຕໍ່​ສຸຂະພາບ (PHE) ສັງ​ກັດ​ອົງການດັ່ງກ່າວ ກ່າວ. “ເຮົາ​ຕ້ອງ​ສຶກ​ສາ​ຜົນ​ກະທົບ​ຂອງ​ໄມ​ໂຄຣພລາສຕິກ​ຕໍ່​ສຸຂະພາບ​ໂດຍ​ເລັ່ງ​ດ່ວນ ເພາະ​ໄມ​ໂຄຣພລາສຕິກ​ມີ​ຢູ່​ທຸກບ່ອນ”, ນາງກ່າວ.

ການສຶກສາ​ທີ່​ເຜີຍແຜ່​ເມື່ອ​ເດືອນ​ພຶດສະພາ 2019 ໂດຍ​ມະຫາ​ວິທະຍາ​ໄລ​ນິວ​ຄາດ​ເຊີນ (UoN) ປະເທດ​ອອສ​ເຕຣ​ເລຍ ລະບຸວ່າ​ຄົນ​ເຮົາ​ຮັບພລາສຕິກ​ເຂົ້າໄປ​ໃນ​ຮ່າງກາຍ​ໂດຍສະເລ່ຍ 5 ກຣາມ​ຕໍ່​ອາທິດ ຊຶ່ງ​ມີ​ນ້ຳ​ໜັກ​ໃກ້​ຄຽງ​ກັບ​ບັດ​​ເຄຣ​ດິດ 1 ໃບ ໂດຍ​ແຕ່​ລະ​ອາທິດ ຄົນ​ເຮົາ​ຈະ​ບໍລິ​ໂພກພລາສຕິກ​ຊິ້ນ​ນ້ອຍ​ໆ ເຂົ້າໄປ​ປະ​ມານ 2,000 ຊິ້ນ ຄິດ​ເປັນ 21 ກຣາມ​ຕໍ່​ເດືອນ ຫຼື​ ຫຼາຍກວ່າ 250 ກຣາມ​ຕໍ່​ປີ.

“ຜົນ​ການສຶກສາ​ເຫຼົ່າ​ນີ້​ເປັນ​ຄຳ​ເຕືອນ​ເຖິງ​ລັດຖະບານ​ປະເທດ​ຕ່າງ​ໆ ເພາະພລາສຕິກ​ບໍ່​ໄດ້​ພຽງແຕ່​ກຳ​ລັງ​ປົນ​ເປື້ອນ​ມະຫາ​ສະໝຸດ ​ແລະ ​ທາງ​ນ້ຳ ຫຼື ຂ້າ​ຊີວິດ​ສັດ​ນ້ຳ​ເທົ່າ​ນັ້ນ ແຕ່​ຍັງ​ຢູ່ໃນ​ຮ່າງກາຍ​ພວກ​ເຮົາ​ທຸກ​ຄົນ ແລະ​ ເຮົາ​ບໍ່​ສາມາດ​ຫຼີກ​ເວັ້ນ​ກາ​ນບໍລິ​ໂພກ​ມັນ​ເຂົ້າໄປ​ໄດ້”, ມາໂກ ລຳແບ​​​ຕິ​ນີ ຜູ້​ອຳ​ນວຍ​ການ​ທົ່ວ​ໄປ​ຂອງ​ອົງການກອງ​ທຶນ​ສັດ​ປ່າ​ໂລກ​ສາກົນ (WWF) ລະ​ດັບ​ນານາ​ຊາດກ່າວ.

ການສຶກສາ​ອີກ​ຊິ້ນ​ໜຶ່ງ​ຊຶ່ງ​ດຳ​ເນີນ​ການ​ໂດຍ​ມະຫາ​ວິທະຍາໄລ​ແຫ່ງ​ລັດ​ນິວ​ຢອກ (SUNY) ແລະ​ ເຜີຍແຜ່​ເມື່ອ​ເດືອນ​ມີ​ນາ 2018 ລະບຸວ່າ​ຫຼາຍກວ່າ​ 90% ຂອງ​ນ້ຳ​ດື່ມ​ບັນ​ຈຸ​ຂວດ ມີ​ການ​ປົນ​ເປື້ອນ​ອ​ະນຸ​ພາກ​ໄມ​ໂຄຣພລາສຕິກ.

ລາຍ​ງານ​ລະບຸວ່າ​ຜົນ​ການ​ວິ​ເຄາະ​ນ້ຳ​ດື່ມ​ແບບ​ກະຕຸກ 11 ຍີ່​ຫໍ້ ຈຳນວນ 259 ກະຕຸກ ຊຶ່ງ​ສຸ່ມ​ຈາກ​ພື້ນ​ທີ່ 19 ແຫ່ງ​ໃນ 9 ປະເທດ ພົ​ບວ່າ​ມີ​ອະ​ນຸ​ພາກພລາສຕິກ​ຢູ່ໃນ​ນ້ຳ​ດື່ມສະເລ່ຍ 325 ອະ​ນຸ​ພາກ​ຕໍ່ 1 ລິດ.

ອະນຸພາກ​ຂະໜາດ​ນ້ອຍ​ນີ້​ອາດ​ມາ​ຈາກ​ຫຼາກ​ຫຼາຍ​ທີ່ ທັງ​ເສັ້ນ​ໃຍ​ເສື້ອ​ຜ້າ​ສັງ​ເຄາະ, ເມັດ​ບີ​ສ​​ໃນ​ຢາ​ສີ​ແຂ້ວ ຫຼື ພລາສຕິກ​ຂະໜາດໃຫຍ່​ທີ່​ອາດ​ຍ່ອຍ​ເປັນ​ຊິ້ນ​ສ່ວນນ້ອຍ​ໆ ເມື່ອ​ຖືກ​ຖິ້ມ ​ແລະ ​ສຳຜັດ​ກັບ​ອາ​ກາດ.

ອະນຸພາກ​ເຫຼົ່າ​ນີ້​ຈະ​ໄຫຼ​ໄປ​ຕາມ​ແມ່ນ້ຳ, ມະຫາສະໝຸດ ຊຶ່ງ​ປາ ​ຫຼື​ ສັດ​ທະ​ເລ​ອື່ນ​ໆ ອາດ​ກິນ​ເຂົ້າໄປ ແລະ ​ເຂົ້າໄປ​ເປັນ​ສ່ວນໜຶ່ງ​ໃນ​ຕ່ອງ​ໂສ້​ອາຫານ​ຂອງ​ມະນຸດ.

ອົງການອະນາໄມ​ໂລກ​ຈຶ່ງ​ແນະ​ນຳ​ໃຫ້​ຜູ້​ຈັດ​ຈຳ​ໜ່າຍ​ ແລະ ​ຜູ້​ຄວບ​ຄຸມ​ຜະລິດຕະພັນ​ນ້ຳ​ດື່ມ ໃຫ້​ຄວາມ​ສຳຄັນ​ກັບ​ການ​ກຳຈັດ​ເຊື້ອ​ພະຍາດ ​ແລະ ​ສານ​ເຄ​ມີ​ທີ່​ເປັນ​ອັນຕະລາຍ​ຕໍ່​ຮ່າງກາຍ​ຂອງ​ມະນຸດ ເຊັ່ນ: ສານ​ທີ່​ເຮັດໃຫ້​ເກີດ​ພະຍາດ​ຖອກທ້ອງ​ຮຸນແຮງ. “ປະຕິບັດການ​ລະ​ດັບ​ໂລກ​ເປັນ​ເລື່ອງ​ເລັ່ງ​ດ່ວນ​ ແລະ ​ຈຳ​ເປັນ​ຕໍ່​ການ​ຈັດການ​ກັບ​ວິກິດ​ນີ້”, ລຳ​ແບ​​ຕິ​ນີກ່າວ.

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *