ຫຸ່ນຍົນຜະລິດໄຟຟ້າໄຮ້ສາຍ ສາມາດຄວ້າລາງວັນທີ 3 ນານາຊາດ

ການແຂ່ງຂັນຫຸ່ນຍົນແມ່ນເພື່ອສົ່ງເສີມ ແລະ ເປີດໂອກາດໃຫ້ໄວໜຸ່ມລາວໄດ້ພັດທະນາຄວາມຮູ້ ຄວາມສາມາດດ້ານສະເຕັມສຶກສາໃຫ້ສູງຂຶ້ນ ສະເພາະແມ່ນຄວາມຮູ້ດ້ານວິທະຍາສາດ, ເຕັກໂນໂລຊີ, ວິສະວະກຳສາດ ແລະ ຄະນິດສາດ ຜ່ານການສ້າງຫຸ່ນຍົນ.

ເພື່ອໃຫ້ນັກຮຽນໄດ້ປະດິດຄິດສ້າງສິ່ງໃໝ່ ຕາມຈີນຕະນາການ ເຮັດໃຫ້ນັກຮຽນມີການພົວພັນສື່ສານ, ເຮັດວຽກຮ່ວມກຸ່ມ, ມີຄວາມຄິດສ້າງສັນ, ສາມາດແກ້ໄຂບັນຫາ, ມີຄວາມກະຕືລືລົ້ນ ອົດທົນ ແລະ ມ່ວນຊື່ນໄປກັບການຮຽນຮູ້. ລະຫວ່າງວັນທີ 2-3 ສິງຫາ 2019, ສູນຮຽນຮູ້ ວີເອຟ ເຊິ່ງເປັນຕົວແທນດ້ານສະເຕັມສຶກສາ ໃນສປປ ລາວ ຮ່ວມກັບ ກະຊວງວິທະຍາສາດ ແລະ ເຕັກໂນໂລຊີ ໄດ້ ສົ່ງນັກຮຽນລາວ ຈຳນວນ 9 ຄົນ ໄປແຂ່ງຂັນຫຸ່ນຍົນຂັ້ນນານາຊາດ ຢູ່ເມືອງເດຊອນ ປະເທດເກົາຫຼີໃຕ້.

ເຊິ່ງການແຂ່ງຂັນທີມຈາກ ສປປ ລາວ ສາມາດຄວ້າລາງວັນມາຄອງໄດ້ 2 ລາງວັນຄື ລາງວັນທີ 2 ປະເພດ ຫຸ່ນຍົນຊົກມວຍ ໄດ້ແກ່ທ້າວ ພອນສະຫວັນ ສົມອາລຸນ ມາຈາກໂຮງຮຽນ ອ໋ອດສະກ້າ ແລະ ລາງວັນທີ 3 ປະເພດ ອອກແບບປະດິດສ້າງຫຸ່ນຍົນ ເຊິ່ງເປັນປະເພດທີ່ແຂ່ງຂັນເປັນທີມ.

ໂດຍການແຂ່ງຂັນອອກແບບປະດິດສ້າງຫຸ່ນຍົນ, ທີມຕົວແທນຈາກ ສປປ ລາວ ໄດ້ ອອກແບບ ການຜະລິດໄຟຟ້າ ໂດຍສ້າງຫຸ່ນຍົນດູດເອົາພະລັງງານຈາກສິ່ງແວດລ້ອມ ແລະ ຈັກກະວານ ມາຜະລິດ ໄຟຟ້າໄຮ້ສາຍແລ້ວສົ່ງຜ່ານສັນຍານອາກາດ.

ເຊິ່ງທີມດັ່ງກ່າວມີທັງໝົດ 4 ຄົນຄື: ທ້າວ ບຸນຍະລິດ ໄຊສຸລຽນ ມາຈາກໂຮງຮຽນ ນານາຊາດວຽງຈັນ, ທ້າວ ຍົດສະພົນ ມີໄຊ ມາຈາກໂຮງຮຽນ ນານາຊາດ ປັນຍາທິບ, ທ້າວ ຊິງອິງ ຈະເລີນທອງ ມາຈາກໂຮງຮຽນວຽງຈັນພັດທະນາ ແລະ ນາງ ທະວີໂຊກ ຄຳວົງສາ ມາຈາກໂຮງຮຽນ Little Star Billingual School. ທ້າວ ບຸນຍະລິດ ໄຊສຸລຽນ ອາຍຸ 15 ປີ ຮຽນຢູ່ຫ້ອງມໍ 5 ໂຮງຮຽນ ນານາຊາດວຽງຈັນ ໃຫ້ສຳ ພາດວ່າ: ນ້ອງເອງແມ່ນໄດ້ຮຽນຮູ້ກ່ຽວກັບຫຸ່ນຍົນທີ່ສູນຮຽນຮູ້ວີເອຟ ມາຕັ້ງແຕ່ຕອນເປີດສູນໃໝ່ໆ ແລະ ໄດ້ໄປແຂ່ງຂັນຫຸ່ນຍົນໃນຄັ້ງນີ້ເປັນຄັ້ງທີ່ 2 ແລ້ວ, ຫຸ່ນຍົນເປັນຂະແໜງຮຽນໜື່ງທີ່ນ້ອງມີຄວາມມັກ ເພາະ ເປັນຂະແໜງການຮຽນຮູ້ທີ່ໃນ ສປປ ລາວ ຍັງບໍ່ທັນພັດທະນາ ແລະ ຂະຫຍາຍາຕົວຢ່າງກວ້າງຂວາງ.

ການແຂ່ງຂັນໃນຄັ້ງນີ້, ນ້ອງເອງມີຄວາມຮູ້ສຶກພາກພູມໃຈທີ່ໄດ້ເປັນຕົວແທນເຂົ້າຮ່ວມການແຂ່ງ ຂັນຫຸ່ນຍົນລະດັບນານາຊາດ ເຊິ່ງມີ 30 ປະເທດໃນທົ່ວໂລກເຂົ້າຮ່ວມ.

ສຳລັບນ້ອງເອງຖືເປັນອີກປະສົບການໜື່ງທີ່ທາງກະຊວງວິທະຍາສາດ – ເຕັກໂນໂລຊີ ແລະ ສູນຮຽນຮູ້ວີເອຟ ທີ່ໄດ້ໃຫ້ໂອກາດແກ່ນ້ອງ ໃນການແຂ່ງຂັນຄັ້ງນີ້ ເຊິ່ງນ້ອງໄດ້ຮຽນຮູ້ຫຼາຍສິ່ງຫຼາຍຢ່າງຈາກການແຂ່ງຂັນໃນຄັ້ງນີ້ ເປັນຕົ້ນແມ່ນຮັບຮູ້ເຖີງຄວາມພັດທະນາດ້ານ ຫຸ່ນຍົນຂອງຫຼາຍປະເທດ, ອຸປະກອນສິ້ນສ່ວນຕ່າງໆຂອງຫຼາຍປະເທດແມ່ນມີຄົບ ແລະ ດີກວ່າຂອງທີມ ເຮົາ, ໄດ້ຮຽນຮູ້ ແນວຄິດດີໆຈາກຫຼາຍປະເທດ, ວິທີໃນການປະກອບສິ້ນສ່ວນຂອງຫຸ່ນຍົນ , ການກຽມຄວາມພ້ອມໃນການແຂ່ງຂັນທຸກຄັ້ງ, ຮຽນຮູ້ການເຮັດວຽກເປັນທີມ ແລະ ສ້າງມິດຕະພາບກັບກັບໄວໜຸ່ມບັນດາປະເທດ.

ການເຂົ້າແຂ່ງຂັນຫຸ່ນຍົນລະດັບນານາຊາດໃນຄັ້ງນີ້ ເປັນຄັ້ງທີ່ 2 ທີ່ນ້ອງໄດ້ເຂົ້າແຂ່ງຂັນ, ເຊິ່ງຄັ້ງ ທຳອິດແມ່ນນ້ອງໄດ້ໄປແຂ່ງຂັນຢູ່ປະເທດໄທ ແລະ ຍາດໄດ້ລາງວັນທີ 5 ເປັນຫຼຽນທອງແດງ.

ເຊິ່ງຖືເປັນ ປະສົບການໜື່ງທີ່ບໍ່ມີໃຜສາມາດຮຽນຮູ້ໄດ້ນອກຈາກໄປແຂ່ງຂັນເອງ ແລະ ເປັນພຶ້ນຖານໃນການກຽມຕົວ ໃນການແຂ່ງຂັນຄັ້ງນີ້.

ການແຂ່ງຂັນໃນຄັ້ງນີ້, ນ້ອງໄດ້ຮັບການຝຶກຈາກສູນຮຽນຮູ້ ວີເອຟ ມາເປັນເວລາ 2 ເດືອນຄື ເດືອນມິຖຸນາ ຫາ ເດືອນກໍລະກົດ ແລະ ນ້ອງປະກອບສ່ວນໃນການແຂ່ງຂັນທັງໝົດ 3 ປະເພດເຊັ່ນ: ຊົກມວຍ, ບານສົ່ງ ແລະ ປະດິດສ້າງຫຸນຍົນເປັນທີມ 4 ຄົນ. ເຊິ່ງການແຂ່ງຂັນໃນຄັ້ງນີ້ ທຸກຕົວແທນທີ່ ມາຈາກແຕ່ລະປະເທດແມ່ນຕ້ອງກຽມເຄື່ອງມືອຸປະກອນໃນການແຂ່ງຂັນໃຫ້ພ້ອມ, ແຕ່ ທີມເຮົາແມ່ນກະ ກຽມບໍ່ຄົບຕາມເປົ້າໝາຍ ແລະ ເຮັດໃຫ້ໃນການແຂ່ງຂັນພົບຫຼາຍບັນຫາຫຍຸ້ງຍາກທີ່ສຸດ.

ເພາະວ່າເຮົາຈະປະດິດຫຸ່ນຍົນໃນການຜະລິດໄຟຟ້າໄຮ້ສາຍ ໂດຍດູດເອົາພະລັງງານຕ່າງໆຈາກ ຈັກກະວານ ແລະ ສິ່ງແວດລ້ອມອ້ອມຂ້າງມາຜະລິດ ແລະ ສົ່ງຜ່ານສັນຍານອາກາດ ເຊິ່ງຕ້ອງການອຸປະ ກອນຈຳນວນຫຼາຍ.

ແຕ່ທີມພວກເຮົາກໍ່ໄດ້ພະຍາຍາມຕັ້ງໃຈ ແລະ ອົດທົນທີ່ສຸດໃນການແຂ່ງຂັນ, ພະຍາ ຍາມໃນການອະທິບາຍ ແລະ ປະກອບປະດິດຫຸ່ນຍົນຕາມອຸປະກອນທີ່ມີຈົນສາມາດຍາດໄດ້ລາງວັນທີ 3 ຖືວ່າຄວາມພະຍາຍາມຂອງທີມແມ່ນຄຸ້ມຄ່າ.

ທ້າວ ບຸນຍະລິດ ໄຊສຸລຽນ ຍັງເວົ້າອີກວ່າ: ການຮຽນຮູ້ຫຸ່ນຍົນແມ່ນບໍ່ໄດ້ຍາກຫາກເຮົາເປັນຄົນທີ່ ຮູ້ພາສາອັງກິດ ຮຽນ 2-3 ມື້ກໍ່ເປັນ, ເພາະການຮຽນແມ່ນຈະນຳໃຊ້ພາສາອັງກິດລ້ວນໆ, ການທີ່ຈະສາ ມາດປະກອບຫຸ່ນຍົນໃຫ້ມີຄວາມແຂງແຮງ, ທັນສະໄໝແມ່ນທຸກຄົນທີ່ຮຽນຕ້ອງມີຄວາມອົດທົນ, ພະຍາ ຍາມ ແລະ ເລີ່ມຮຽນແຕ່ງ່າຍຫາຍາກຕາມແຕ່ລະຂັ້ນຕອນ ແລະ ເຮັດໄປເລື້ອຍໆກໍ່ຈະຮູ້ເອງ. ຫຸ່ນຍົນເປັນ ສິ່ງທີ່ສຳຄັນ ແລະ ຈຳເປັນ ໃນຍຸກ 4.0,​ ເພາະບັນດາປະເທດທີ່ພັດທະນາແລ້ວ ແລະ ມີຄວາມຈະເລີນ ກ້າວໜ້າທາງດ້ານເຕັກໂນໂລຊີແມ່ນກຳລັງເລີ່ມນຳໃຊ້ຫຸ່ນຍົນເຂົ້າໃນຂະແໜງວິສະວະກຳສາດ ເປັນຕົ້ນ ແມ່ນຫັນຈາກການໃຊ້ແຮງງານຄົນມາເປັນການໃຊ້ຫຸ່ນຍົນແທນ.

ນາງ ທະວີໂຊກ ຄຳວົງສາ ອາຍຸ 15 ປີ ຫ້ອງມໍ 5 ມາຈາກໂຮງຮຽນ Little StarBillingual School ໃຫ້ສຳພາດວ່າ: ການແຂ່ງຂັນຫຸ່ນຍົນທີ່ ປະເທດເກົາຫຼີໃຕ້ໃນຄັ້ງນີ້ຖືເປັນປະສົບການຄັ້ງທຳອິດທີ່ ໄດ້ໄປເປີດຫູເປີດຕາ ຮຽນຮູ້ ແລະ ລົງມືເຮັດຕົວຈີງໃນເວທີສາກົນ.

ນ້ອງເອງຮູ້ສຶກພູມໃຈ ແລະ ຕື່ນເຕັ້ນ ເມື່ອໄດ້ຍີນກຳມະການປະກາດຜົນວ່າ ທີມເຮົາໄດ້ທີ 3, ເຖີງວ່າບໍ່ແມ່ນທີ່ 1 ແຕ່ເຮົາກໍ່ຮູ້ສຶກພູມໃຈທີ່ສຸດ, ເພາະເປັນປະສົບການຄັ້ງທຳອິດທີ່ຈະນຳໄປສູ່ຄວາມສຳເລັດຄັ້ງຕໍ່ໄປ. ສຳລັບນ້ອງເອງແມ່ນໄດ້ເຂົ້າຮຽນຮູ້ກ່ຽວກັບຫຸ່ນຍົນຢູ່ສູນຮຽນຮູ້ວີເອຟ ເປັນເວລາ 5 ເດືອນແລ້ວ, ໂດຍເລີ່ມມາຕັ້ງແຕ່ເດືອນມີນາ 2019.

ການຮຽນຫຸ່ນຍົນເປັນການຮຽນຮູ້ໜື່ງທີ່ມີຄວາມສຳຄັນທີ່ສຸດໃນ ຍຸກດິຈິຕອລ. ນອກຈາກຈະໄດ້ຮຽນແລ້ວຍັງໄດ້ປະຕິບັດຕົວຈີງ ໃນການສ້າງຫຸ່ນຍົນ, ນຳເອົາທິດສະດີ ແລະ ການຄິດໄລ່ທາງຄະນິດສາດຕ່າງໆທີ່ເຄີຍຮຽນມາກ່ອນມາປະດິດສ້າງເປັນຫຸ່ນຍົນ.

ນາງ ທະວີໂຊກ ຄຳວົງສາ ຍັງເວົ້າອີກວ່າ: ການສ້າງຫຸ່ນຍົນເປັນເລື່ອງທີ່ງ່າຍ ສາມາດຮຽນ 2 – 3 ມື້ ກໍ່ສາມາດສ້າງໄດ້ ແຕ່ການທີ່ຈະສ້າງຫຸ່ນຍົນໃຫ້ມີຄວາມແຂງແຮງພໍໃນການຍູ້, ຍົກ ແລະ ເຄື່ອນ ເໜັງ ປະຕິບັດໜ້າວຽກຕາມທີ່ເຮົາຕ້ອງການແມ່ນຍາກທີ່ສຸດ.

ຕ້ອງອາໄສການຮຽນຮູ້, ປະສົບການ ແລະ ຄວາມອົດທົນ, ສະເພາະແມ່ນຫຸ່ນຍົນທີ່ສ້າງໃນການຫຼິ້ນກິລາບານສົ່ງ ທີ່ຕ້ອງສ້າງໃຫ້ມີຄວາມແຂງແຮງ ເນື່ອງຈາກຈະຍົກແລ້ວ ຍັງຈະຕ້ອງໂຍນ.

ຫຸ່ນຍົນເປັນຂະແໜງການຮຽນຮູ້ໜື່ງທີ່ນ້ອງມັກມາແຕ່ຕອນຍັງນ້ອຍ ໂດຍເປັນຄົນມັກປະກອບສິ້ນ ສ່ວນຕ່າງໆເຂົ້າດ້ວຍກັນເປັນຂອງຫຼິ້ນໃນສະໄໝເປັນເດັກ. ເຊິ່ງໃນປີນີ້ ທີ່ນ້ອງໄດ້ໄປແຂ່ງຂັນແຕ້ມຮູບຢູ່ ສູນການຄ້າສາກົນ ເວີລເທຼດ ແລ້ວເຫັນໃບປີວກ່ຽວກັບສູນຮຽນຮູ້ວີເອຟ, ນ້ອງກໍ່ມາສະໝັກຮຽນເລີຍ ໂດຍ ພໍ່ແມ່ກໍ່ໃຫ້ການສະໜັບສະໜູນ ແລະ ມາລອງຮຽນກ່ອນປະມານ 1 ອາທິດຫຼັງຈາກນັ້ນກໍ່ເຂົ້າຮຽນ.

 

ແຫຼ່ງຂ່າວ: ເສດຖະກິດ-ການຄ້າ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *