ສ້າງຄວາມເຂັ້ມແຂງໃຫ້ຄູ-ອາຈານ ໃນການນຳໃຊ້ປື້ມແບບຮຽນຄູ່ມືຄະນິດສາດ

ຫ້ອງການສຶກສາທິການ ແລະ ກິລາ ເມືອງໄຊທານີ ຈັດຝຶກອົບຮົມການ ນຳໃຊ້ປື້ມແບບຮຽນ ແລະ ຄູ່ມື ວິຊາຄະນິດສາດ ຊັ້ນປະຖົມສຶກສາ ປີທີ 2 ລະຫວ່າງ ວັນທີ 16-17 ສິງຫາ 2019 ທີ່ໂຮງຮຽນມັດ ທະຍົມສົມບູນໂຄກອີໄລ ເມືອງໄຊທານີ ນະຄອນຫລວງວຽງຈັນ,

ໂດຍມີ ທ່ານ ດາວວອນ ສິມມາລາວົງ ຫົວໜ້າຫ້ອງການສຶກສາທິການ ແລະ ກິລາ ເມືອງໄຊທານີ, ທ່ານ ນາງ ອຳພອນ ອານຸໄຊຍາ ຫົວໜ້າຂະແໜງພັດທະນາຄູ ພະແນກສຶກສາທິການ ແລະ ກິລາ (ນວ) ພ້ອມດ້ວຍບັນດາຄູ-ອາຈານ ຈາກໂຮງຮຽນພາກລັດ ແລະ ເອກະຊົນ ເຂົ້າຮ່ວມ.

      ໂອກາດນີ້, ທ່ານ ດາວວອນ ສິມມາລາວົງ ກ່າວວ່າ: ເປົ້າໝາຍສໍາຄັນຂອງການຝຶກອົບຮົມ ແມ່ນແນໃສ່ຍົກສູງຄວາມສາມາດ ສ້າງໃຫ້ບັນດາຄູ-ອາຈານ ຮັບຮູ້ ແລະ ເຂົ້າໃຈ ກ່ຽວກັບການໃຊ້ປື້ມແບບຮຽນ ແລະ ຄູ່ມືຕ່າງໆ ໃຫ້ຖືກຕ້ອງຕາມຫລັກສູດ ມີປະສິດທິພາບໃນ ການຮຽນ-ການສອນ ໃຫ້ໄດ້ຮັບການປັບປຸງເປັນກ້າວໆ ທັງເຮັດໃຫ້ຜູ້ເຂົ້າຮ່ວມຝຶກອົບຮົມ ກຳແໜ້ນເຖິງແນວທາງວິທີການສອນ, ໂດຍນຳໃຊ້ປຶ້ມແບບຮຽນ ແລະ ຄູ່ມືຄະນິດສາດໃໝ່ທີ່ໄດ້ຖືກພັດທະນາ ແລະ ປັບປຸງໃຫ້ສອດຄ່ອງກັບ ການຮຽນການສອນໃນປັດຈຸບັນ ເປັນຕົ້ນແມ່ນ ບົດຮຽນກ່ຽວກັບການກະກຽມ ການສອນສາທິດ ການຝຶກຄິດໄລ່ ແລະ ເຕັກນິກການສອນໃນຫ້ອງຮຽນ.

ສຳລັບການຝຶກອົບຮົມຄັ້ງນີ້, ຫ້ອງການສຶກສາທິການ ແລະ ກິລາ ເມືອງໄຊທານີ ໄດ້ປະສານສົມທົບກັບພາກສ່ວນກ່ຽວຂ້ອງ ໂດຍສະເພາະແມ່ນ ພະນແນກສຶກສາທິການ ແລະ ກິລາ (ນວ) ລົງເຄື່ອນໄຫວເຜີຍແຜ່ອົບຮົມ ໃຫ້ບັນດາກຸ່ມ ໂຮງຮຽນພາຍໃນເມືອງ ທັງພາກລັດ ແລະ ເອກະຊົນ 93 ແຫ່ງ.

 

ແຫຼ່ງຂ່າວ: ຂປລ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *